Елена Рыбакина Қытайдағы турнирде үздік шықты

Қазақстанның бірінші, әлемнің 9-ракеткасы Елена Рыбакина Нинбо (Қытай) WTA 500 турнирінің чемпионы атанды.

Қазақстандық теннисші финалда әлемнің 10-ракеткасы, ресейлік Екатерина Александровамен чемпиондық атақты сарапқа салды. Бұл жолы бірінші партия ресейлік спортшының пайдасына шешілді – 6:3. Екінші сетте Рыбакина бет қаратпады – 6:0. Содан кейін үшінші сетте 3:0 есебімен алға шықты. Бәсеке барысында Елена қатарынан тоғыз геймді өз есебіне жазды. Ақыры матчты брейкпен бітірді – 6:2.

Осылайша, Рыбакина биыл екінші титулына қол жеткізді жалпы Еленаның қоржынында 10 WTA титулы бар. Бұдан бұрын ол Страсбург (Франция) WTA 500 жарысында үздік шыққан еді.

Рыбакина дүйсенбі күні басталатын Токио (Жапония) WTA 500 додасында екінші ракетка болып тіркелген. Ол екінші айналымда әлемнің 27-ракеткасы, канадалық Лейла Фернандес немесе рейтингіде 55-сатыдағы грекиялық Мария Саккаридің қай жеңгенімен кездеседі. Қазақстандық теннисші Токиода жартылай финалға дейін жетсе, қараша айында Сауд Арабиясының Эр-Рияд қаласында өтетін жылдың қорытынды турниріне жолдама алады.